प्रेम विवाह गर्दा जगिरै चट् |
बारा, असार १३ – छात्रासँग प्रेमविवाह गरेका एक शिक्षकलाई सदरमुकामको रामराजा मोहनबिक्रम शाह बहुमुखी क्याम्पसले पढाउन रोक लगाएको छ ।
क्याम्पस प्रमुख नन्दन साहले क्याम्पस सञ्चालक समितिको निर्देशन बमोजिम सिंहलाई अध्यापनमा रोक लगाइएको बताउनुभयो । क्याम्पस सञ्चालक समितिका अध्यक्ष सुरेशकुमार मोदकले शिक्षक सिंहले प्रेम विवाह गरेर क्याम्पसको सामाजिक वातावरण बिगारेकाले पढाउन रोक लगाइएको बताउनुभयो ।
पाँच वर्षदेखि प्रेम सम्बन्धमा रहेका शिक्षक सिंह र पाण्डेले गत जेठ ९ गते सर्लाही जिल्ला अदालतमा कानूनी रुपमा र मलङ्गवाकै भगवती मन्दिरमा पारम्परिक विहे गरेका थिए । जेठ २१ गते क्याम्पसमा जादा क्याम्पस प्रमुख साह र सहायक क्याम्पस प्रमुख हरिभुषण कुशवाहाले क्याम्पस प्रमुखको कार्यकक्षमै बोलाएर ‘तपाईंहरुको विहेको प्रक्रिया मिलेन, त्यसैले भोलीदेखि क्याम्पसमा नआउनु होला’ भनेर निर्देशन दिएको शिक्षक सिंहले बताउनुभयो ।
पीडित सिंहले आफुले दाइजो बिना अन्तरजातीय विहे गरेर समाजका लागि उदाहरणीय काम गरेपनि क्याम्पस प्रशासनले जागिरबाट निकालेर अन्याय गरेको गुनासो गर्नुभयो ।
वीरगन्जको हरिखेतान बहुमुखी क्याम्पसमा अध्ययनरत पाण्डेलाइ शिक्षक सिंहले नै आफुले पढाउने कलैयाको क्याम्पसमा ट्रान्सफर गराउनुभएको थियो । नागरिक समाज बाराका अध्यक्ष सुखप्रसाद चौधरीले भने प्रेम विवाह गरेकै कारण शिक्षकलाइ क्याम्पस पढाउन रोक लगाउनु गलत भएको बताउनुभयो ।
