१८ असार, काठमाडौँ । रत्न पत्थर आभूषण अध्ययन समितिले जथाभावी ढुंगा निकासीमा तत्काल प्रतिबन्ध लगाउन सरकारलाई सुझाव दिएको छ ।
ढुंगामा रहेका बहुमूल्य रत्न, आभूषण पनि ढुंगाकै मूल्यमा भारतलगायत मुलुक निकासी भइरहेकाले स्वदेशमै प्रशोधन गर्न समितिले बाणिज्य तथा आपूर्ति मन्त्रालयलाई सिफारिस गरेको छ ।
व्यापार तथा निकासी प्रवर्द्धन केन्द्रका कार्यकारी निर्देशक ईश्वरीप्रसाद घिमिरे संयोजकत्वको समितिले लाखौँ मूलय पर्ने बहुमूल्य रत्न, आभूषण, पत्थर कौडीको मूल्यमा भारतमा निकासी भइरहेको निष्कर्ष निकालेको छ ।आजको कारोवार दैनिकले समाचार छापेको छ ।
‘त्यसैले कच्चा पदार्थको रुपमा निकासी भइरहेको ढुंगा प्रशोधन गरेरमात्र विदेश निकासी गर्नुपर्ने देखिन्छ,’मुख्यसचिव लीलामणि पौडेललाई समेत बुझाएको प्रतिवेदनमा भनिएको छ । ‘
नेपालगञ्ज, भैरहवा, झापा, सुर्खेत, धादिङ, ताप्लेजुङलगायत क्षेत्रका ढुंगामा बहुमूल्य पत्थर रहेको दावी समितिको छ ।
यी क्षेत्रबाट ढुंगा निकासीमा प्रतिबन्ध लगाई प्रशोधन गर्न र बहुमूल्य पत्थर छुट्याएर मात्र निकासी गर्न उसले सुझाएको छ । प्रशोधनका लागि आवश्यक पूर्वाधार निर्माण गर्न र स्थानीयलाई तालिम दिन पनि समितिको राय छ ।
